Инвестор

Өмірбаяны

Болат Өтемұратов – Forbes қазақстандық тізіміндегі Қазақстанның табысты кәсіпкерлерінің бірі. Ол «Верный капитал» компаниясының негізгі инвесторы және денсаулық сақтау, білім беру, қалалық жоспарлау және мәдениет саласындағы әлеуметтік маңызы бар жобаларды іске асырумен айналысатын Болат Өтемұратов қорының құрылтайшысы.

Кәсіби мансап

Болат Өтемұратов - Нархоз университетінің «экономика» мамандығы бойынша түлегі. Ол өзінің кәсіби жолын 1986 жылы аудандық атқару комитеті төрағасының орынбасары ретінде бастады.  Келесі 10 жыл бойы ол Сыртқы экономикалық байланыстар жөніндегі мемлекеттік комитетте, Вена қаласындағы Қазақ сауда үйінде, содан кейін Қазақстан Республикасының Сыртқы экономикалық байланыстар министрлігінде және Өнеркәсіп және сауда министрлігінде жұмыс істеді.

1995 жылы Болат Өтемұратов серіктестерімен бірлесіп Алматы сауда-қаржы банкінің (АТФ Банк) негізін қалады, ал 2007 жылы оның жалғыз бақылаушы акционеріне айналды. Осы уақыт ішінде АТФ Банкі шағын қаржы мекемесінен банк нарығының жетекші ұйымының біріне айналды. 2007 жылы Болат Өтемұратов миноритарлық акционерлермен бірлесіп АТФ Банкін итальяндық UniCredit тобына рекордтық 2,2 миллиард долларға сатты. Сарапшылардың бағалауынша, бұл мәміле 2007 жылдың қорытындысы бойынша ТМД банк секторындағы ең ірі мәміле болды.

1996-1999 жылдар аралығында Болат Өтемұратов ҚР Швейцариядағы Төтенше және Өкілетті Елшісі болды. 1999 жылғы ақпаннан бастап 2013 жылғы мамырға дейін ол ҚР Президентінің Қауіпсіздік кеңесінде және Әкімшілігінде әр түрлі лауазымдарды атқарды. Өтемұратовтың мемлекеттік қызметтегі соңғы лауазымы – Президенттің Қырғыз Республикасымен ынтымақтастық мәселелері жөніндегі арнайы өкілі. 2007 жылдың шілдесінен 2022 жылдың қаңтарына дейін «Нұр Отан» халықтық-демократиялық партиясының саяси кеңесінің мүшесі болды.

Қайырымдылық қызметі

Болат Өтемұратов - өзінің инвестициялық активтерінде тұрақты даму және әлеуметтік жауапкершілік қағидаттарын белсенді енгізетін табанды филантроп. «Верный капитал» компаниялар тобы екі жетекші білім беру мекемесін қолдайды: Алматыдағы Нархоз университеті, сондай-ақ Нұр-Сұлтан мен Алматыдағы Haileybury халықаралық мектептері. Университет пен мектептер коммерциялық емес мекемелер болып табылады, олардың қызметінен түскен пайда кадрлық әлеуетті дамытуға, инфрақұрылымды жақсартуға және білім беру мекемелерінің, оқыту үдерісін жетілдіруге бағытталады .

Болат Өтемұратов қоры аутистік спектрдегі аурулары бар балаларды тәрбиелеп отырған отбасыларға көмек береді, мүгедек балалардың ата-аналары қауымдастығына қолдау көрсетеді, сондай-ақ оқушыларға білім беру саласындағы ірі жобаларды – Jas Leader Akademiiasy мен Жасыл мектептерді, сондай-ақ қалалық жоспарлау саласындағы жобаларды, Алматыдағы ботаникалық бақты қайта жаңартуды қаржыландырады. Қор Қызыл Жарты Ай Қоғамымен және ForteBank-пен ынтымақтастықта дүлей апаттардан зардап шеккен қазақстандықтарға көмек көрсетеді. Тұрғын үйге мұқтаж қазақстандықтарға жәрдем көрсету үшін Қор «Баламекен» жобасын іске қосуға бастамашылық етті, оның аясында Қазақстанның 4 қаласында 390 жаңа үй салынды. 2020 жылы Болат Өтемұратов Қазақстандағы COVID-19 пандемиясына қарсы күреске бойынша қолдау ретіндегі қайырымдылыққа 5,5 миллион АҚШ долларын бағыттады.

2022 жылдың қаңтарында Болат Өтемұратов Президент Қасым-Жомарт Тоқаевтың тапсырмасы бойынша «қайғылы қаңтар» оқиғасынан кейін құрылған «Қазақстан халқына» қоғамдық-әлеуметтік қорына 23 миллион АҚШ долларын табыс етті.

Әлеуметтік маңызы бар бастамаларды іске асыруға салынған қаражаттың жалпы көлемі 100 миллион АҚШ долларды құрайды.

Қазақстандықтардың спорттық болашағына қосқан үлесі

Болат Өтемұратов 2007 жылдан бастап Қазақстан теннис федерациясының Президенті қызметін атқарады және қазіргі уақытта ол Халықаралық теннис федерациясының (ITF) Директорлар кеңесінің мүшесі және вице-президенті болып табылады. Б. Өтемұратов Қазақстанда осы спортты дамытуға 80 миллион АҚШ долларынан астам инвестиция салды, бүгінгі таңда Қазақстанның теннис федерациясының филиалдары еліміздің барлық облыс орталықтарында және ірі қалаларында жұмыс істейді, ал елдің ұлттық құрамалары әлемнің үздік 20 құрамаларының қатарына кіреді.