Рейтинг білім беру бағдарламаларының тиімділік көрсеткіштеріне негізделген.
Академиялық адалдық лигасы қазақстандық жоғары оқу орындарының жыл сайынғы рейтингінің нәтижелерін ұсынды. Биыл рейтингте 85 жоғары білім беру ұйымы бар. Нархоз Университеті өткен жылмен салыстырғанда 9-орыннан серпіліс жасап, 91,18% нәтижемен бірінші орынды иеленді.
Әдіснама түлектердің орташа жалақысы, жұмысқа орналасу деңгейі және жұмыс іздеу ұзақтығы сияқты объективті көрсеткіштерді қамтиды, сонымен қатар түлектердің сарапшылық бағасы мен мансап келешегін бағалау ескеріледі.
«Жоғары оқу орнының рейтингтегі орны оның білім беру бағдарламаларының бәсекеге қабілеттілігін көрсетеді, өйткені тиімділік пайызын есептеу кезінде ұқсас білім беру бағдарламаларын іске асыратын бәсекелестердің саны ескеріледі. Айта кететіні, алғашқы ондықтағы 7 ЖОО – жекеменшік университеттер, бұл Қазақстандағы жоғары білім беру жүйесінде салауатты бәсекелестіктің болуын дәлелдейді», – делінген хабарламада.
Есептеу үшін ҚР Ғылым және жоғары білім министрлігінің тапсырысы бойынша «Атамекен» ҰКП құрастырған жоғары оқу орындарының білім беру бағдарламалары рейтингінің ресми деректері пайдаланылады, онда Нархоз түлектерге сұраныс бойынша бірінші орынды иеленді.
Рейтинг нәтижелері мына сілтеме бойынша ақпараттық-талдамалық дашборд нысанында ұсынылған. Талапкерлер жоғары оқу орындарының орындарымен танысып, университет пен мамандықты таңдау кезінде салмақты шешім қабылдай алады.
Академиялық адалдық лигасы – Қазақстан Республикасының жоғары және жоғары оқу орнынан кейінгі білім беру ұйымдарының академиялық адалдықтың негізгі қағидаттарын ілгерілету және іске асыру арқылы білім беру сапасын жақсарту және арттыру мақсатында жұмыс істейтін қауымдастығы.
